Зангари шаер

Туннэ – 24.08.2014 арнянунал, кылиз одӥг час Зангари шаерэ кошкытозям. Кызьы эшшо нималод на Эстониез, куке sinilill солэн официальной символэз лыдъяське. Тыбыр сьӧрын – 11 «синкылиен, сюлэмшугъяськонэн, возьманэн, олокӧня арам бырем кагазэн, валантэм документъёсын тырмемем» толэзь. Азьпалан – «кема возьмам, льӧль малпанъёсысь» 10 дышетскон толэзь.

IMG_2961

Кылем гужем мон кызьы но озьы йылпумъяй университетэз но киям сётӥзы лыз дипломме. Кема малпаськытэк пыри Исторической факультетысь магистратурае. Малы отчы? Котьку но потэ вал исторической образование басьтэме, озьы ке но Удмурт факультет сюлмылы матынгес вал. Нош татын сыӵе ваньмыз ӟеч тупаз – Инмар тыбыре вешам кадь – диплом басьтӥ, уже вань, улон инты вань, туган ӧвӧл :) Со сяна программа но туж тунсыко – «Финно-угорский мир в историко-культурном и социально-политическом измерении», лыдӟыса ик дыльды вия ни. Собеседование ортчыкум ик пырак верай вуоно кивалтӥсьмылы – Мельникова Ольга Михайловналы: монэн капчи уз луы, школа трос дыр, ӟыгар быдтоз, трос кошкыло конференциосы/семинаръёсы/эшшо кытчы ке, нош 2тӥ курсын воксё малпасько мыныны кунгож сьӧры дышетскыны. Тае кылыса ик, дыр, Ольга Михайловна чик малпаськытэк монэ кутӥз.

Вуиз сӥзьыл, кема возьмам Erasmus Mundus нимо программа кутскиз, кудӥз сётэ Россиысь но Европаысь студентъёслы стипения (яке грант) ог-огзы доры дышетскыны мынон понна. Программае пыриське Россиысь 10 но Европаысь 10 университет. Кема возьмам программа. Пыриськи. Результатэз та постэлэн нимаз. Ворми.

Быдэс та вакытэз 4 этаплы люкыны луэ: 1. дасяськон/документъёсты дасян 2. кема возьман но результатъёсты тодыса вуоно арлы дасяськон 3. кунгож сьӧрын дышетскон 4. бертыса тыш сиён но зачёт/экзамен/госэкзамен/диплом сётон. Мон туннэ нуналлы 2 этапсэ гинэ ортчи ай, соос сярысь ик верало. Та тунсыко луоз кунгож сьӧры мыныны дасяськись адямиослы. Мукетъёсыз быгато пумзэ гинэ лыдӟыны :)

Азьло ик кутскы англи кылэз дышетыны. Пыриськод-а уд-а программае, нош кылэз тодон ноку уз люкеты. Малпаськы, кулэ-а тыныд трос проблема. Малпаськид? Эшшо огпол малпаськы. Али но кулэ ке, вэлкам.

Калыккуспо ужъёсъя управление (УМС) котькуд сӥзьыл Erasmus Mundus программаен тодматскон радъя. Отын Лариса Витальевна Евсеева тютёпиослы кадь ваньзэ кушаса-кушаса валэктэ. Нош тон тютёпи ук, соин ик тон номыре, конечно, уд валаськы. Воксё паймыса бертӥськод дорад, нош ик презентациез учкиськод, англи кылын гожтэм информациез лыдӟиськод (тон англи кылэз дышетӥд ук ини?!). МАЛПАСЬКЫ ЭШШО ОГПОЛ!!! Али но соглаш? Куанер... Мынӥськом азьлань.

Одно ик вераськы деканэн, наукая кивалтӥсеныд. Факультетысь кивалтэт мед тодоз тынад малпанэд сярысь но соглаш луоз. Тыныд сёто 1,5 толэзь вань документъёсты дасян понна, но со, зэмзэ ке, оптыттэм адямилы уг тырмы.

Нырысь ик быръёно 10 пӧлысь кельшымон университет, сайтаз пырано, шедьтоно дышетсконэдлы тупась программа. Мон дэмласько котькудӥзлэсь университетлэсь сайтэ эскерыны (а не мон кадь – Эстонилэсь но Финляндилэсь гинэ). Собере 1, 2 яке 3 университет (3 максимум) бырйыса котькудӥзлы нимаз «пакет документов» люкано. Кылсярысь, магистрантъёслы кулэ:

Берпуметӥ куинь пункт мон понна самой-самой секыт вал. Мон соосты зырымен синкылиез ымныртӥм зыраса гожтӥ. Та вакытэ начарми но, дыр (ӧй, конечно, просто оскеме потэ!). Та вакытэ зол юрттӥз Венгриысь эше, уго куд-ог дыръя палэнысен но учкем кулэ, мае-сое эскероно. Университет но вала кыӵе секыт тодӥсьтэм муртлы та 3 документэз дасяны, соин ик нимаз семинаръёс радъя. Отчы ОДНО ик ветлоно! Ӧд ке ветлы, уд быгаты гожтыны!!! Таиз зэм!

Куке вань документ дась ини но Лариса Витальевна соосыз эскериз, кулэ электронной анкета келяны (ссылка сётозы). Анкета йылпумъямед бере, тыныд сётӥське персональной номер. Документъёстэ сканировать карыса, котькудаз номердэ гожтоно но программалэн электронной почтаяз келяно. Соослэн штаб-квартиразы Турку карын (Финляндия), нялтас вераса.

Та гожтэмме лыдӟыса гинэ номыре уд вормы. Аслыд трос утчано, юалляськоно, эскероно, ужано. Но, оло, тае лыдӟыса кӧня ке валалод, кыӵе шуг-секытъёсын пумиськод.

Пыриськы но вормы! :)

2.

Документъёстэ лэзид? Малпаськод али капчиен шокчод но изьыны гань-гань быгатод? Облом. Эшшо 5 толэзь результат возьмано! :D Номыр кароно ӧвӧл, возьмано гинэ. Вуэ нунал (30тӥ оштолэзь), куке сайтэ пырыса тон адӟиськод аслэсьтыд персональной номердэ вормисьёс пӧлын. Куддыръя луэ тазьы но – малпаськод, Финляндие мынод шуыса, нош тонэ ӧтё Эстоние J

Вормоооон! Быгато изьыны ни!

Уд! Уд быгаты! Сӥзьыл деканат соглаш вал тонэ келяны дунне пыдсы но, нош али шуо: «А как же пед.практика? А как же научно-исследовательская практика? А когда Вы будете сдавать гос.экзамен? Может Вы возьмёте Академический отпуск?» Маааар?! Академ? Тӥ нуназе чай интые мае юиськоды? Монэ программае кутӥзы мон студент шуыса ук! Кыӵе нафик академ вообще?! Дунне пограз. Шунды кысӥз. Пукиськод коридорын йырсидэ ишкаса. Витьымтэ шорысь кылдэ «фея-крёстная» Мельникова О.М., со шуэ али ваньмыз луоз умой шуыса :) Оскытэк васькиськод на вуж деканэд доры. Кондратьева Н.В. но шуэ али ваньмыз тупалоз шуыса. Та кык кышномуртъёс вань бюрократъёслэсь йырвизьзэс берыкто но пӧсьтолэзе тон пед.практикаын ни. Просто мон шудо парсь. Зэмзэ вераса, таиз сярысь тулыс ик малпано вал ини но практикаосыз азьло ик ортчоно вал. Мон лох, ма карод на?

Эшшо сюмильон документ бичай, олокӧня пол жаляй программае пыриськи шуыса, уж дорысь кошки, квартираысь 6 ар ӵоже люкам хламме гуртэ ваи, ветлӥ Муское виза/вид на жительство лэсьтыны. Отын но приключениостэк ӧз пӧрмы. Шедьтӥсез шедьтоз. Миськи удмурт дӥсьме, басьтӥ Легенда Италмаса. Пукисько ачим быдӟа чемодан азьын. Мар поныны ик паймисько.

Мынам ТЫНЫД кужым сӥземе потэ. Но чидан! Али мыным ваньмыз капчи йӧтэ ни. Ӧй ке но басьтысал та грантэз, мынам луысал опытэ. Опытэз нокыӵе уксёен уд дунъя.

Нялтас вераса, анае-атае тодӥзы программае пыриськи но ворми шуыса май толэзе гинэ. Жаляй нерваоссэс.

Туннэ – 24.08.2014 арнянунал, кылиз ӝыны час Зангари шаерэ кошкытозям. Нош отын выжыкыллэн 3тӥ этапэз кутскоз.

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер