ТОП-10 юанъёс Эстониын улон-вылон сярысь

Кызьы ке ар талэсь азьло гожтӥ вал пост, Эстоние дышетскыны мыно шуыса. Ар лобӟиз но кошкон дыр вуэ ни. Со кышкыт нунал вуэмен йырин тросгес но тросгес кылыны кутскисько типичной юанъёс, кудъёссэ ми Настяен ӵош улӥегес люкам. Куанэ.

 

 

1. Ӟучъёсыз уг ярато отын, да?

Котькуд нунал тышкало! Улонниысь потыса уг вуттӥскы, кин ке мыжыкъёсыныз шонаса дорам лыктэ ни. Лыз-вож ымнырын ветлӥсько. Улӥськом кышкаса, куарамес поттыны дӥсьтытэк. Серьёзно? Тӥ озьы малпськоды? Бен котькытын но шузигес национализмен вырӟемын адямиос сюро, но оске! дунне вылын адекватной адямиос тросгес!

 

2. Уд мӧзмиськы-а, бон? Бертэмед уг поты-а? Ку бертӥськод ни?

Уг. Уг мӧзмиськы! Анай-атае, семьяе доры бертасал, бакчае потыса кияр сиысал, матысь эшъёсыным адскысал, кунояськысал но берен ик кошкысал. Жаляса верано, САЛ-эз тросгес. Зэмзэ вераса, мыным эстон омырен туж капчи шокаське. Яратоно эше котьку вӧзам, анай-атайме котькуд нунал скайпысь адӟисько. Университет студентъёслы сётэ тузи лыдӟиськонни, Эстон шаер – дунтэк wifi, Лённарт Мери нимо фонд – тырмыт стипендия. Ку бертӥсько? Ӝоген! Но арнязэ квартираын ватскыса уло, дипломез гожтыны тыршо ик!

 

3. Туган шедьтӥд ни-а отысь? Бизёд ни, отцы кылёд ни!

Хаха, яратоноез! Кылӥськом регулярно! Кыкнамы ик! Соин йырингес туганЭНЫМ авка пуктӥ контактэ. Туган сярысь юанъёс огвакытлы дугдӥзы. Кыкетӥ тулкым вуиз выль юанэн: “Кытысь, бон, туганэд?” Собере нош ик: “Бизёд ни, отчы кылёд ни!” Туганэ Германиысь. Кылдӥз ке – бызё. Юри ӧй утча. Тузи удмурт сюрысал ке, удмуртлы но бызьысал! Татчыозь тузи удмурт нылъёс гинэ сюрылӥзы. Хм.. Тоже урод ӧвӧл, в принципе :D

 

4. Английскиен умой вераськиськод, дыр, ни.

Эстоние кошкытозь но туж ик урод уг вераськиськы вал. Но аудиториын пукыса ортчем дырез дышетод-а, яке нуналаз 24 час англи (эстон но) кыл пӧлын улод-а? Озьыен, али ми тросгес юмшанэн, утялскон-пӧраськонэн герӟаськем кылъёсты, урод кылъёсты тодӥськом. Куддыръя уй шорын сайкатӥсез луэ, калыд ӧвӧл, вераськыны быгатыны кулэ.

 

5. Отын удмуртъёсты уг тодо!

Кӧня ке тодо, малы ке шуоно Эстон шаерын ог 300 удмурт улэ. Кызьы соос татчы вуизы? Мон уг тодӥськы! Инмар гинэ тодэ, дыр. Оло, дунтэк wifi яке немец карт утчаны. Со сяна, 9 толэзь ӵоже (кыл сётӥсько!) нуналаз одӥг пол ке но, ми Настяен вераллям удмуртъёс, финнъёс-эстонъёс-венгенръёс, пельнянь, Брангурт песянайёс сярысь лекциез. Опыт: «лекциез» лякытгес радъяны ӝытазе яке уйин, барын яке клубын, капчиятскем, кудӟем яке совсем кудӟем студентъёслы. Час ортчыса, соос асьсэлэсь нимзэс но уг ни тодо, но капчиен вераны быгато Удмурт Элькунлэсь быдӟалазэ.

 

6. Европаын умой уло, асьмемын не сравнишь!

Оо, соос ветло зарниен чеберъям азвесь сьӧросэ, сиськем бере ымдурзэс 100 евро купюраен ӵушыло (сьӧросазы 50 евро купюраос гинэ, правда, возё). Коркаосазы, бразильской сериалъёсын сямен, пыдкутчанэн ветло. Соос понна куанергес, «неевропейской» прислуга сиён пӧра, утялске, нылпиоссэс уте. Шурын уг пыласько, малы ке шуоно котькудӥзлэн европеецлэн аслаз бассейнэз вань. Ватсаса, котькудӥз европеец англи кылын анай кылыныз сямен вераське, конечно, мынэсьтым но Настялэсь тузӥгес! Ми Европаысь ӧвӧл ук!

 

7. Эстонецъёс тормозъёс-а?

Так-то озьы быдэс дунне малпа, кадь. Соос ӧвӧл тормозъёс. Эстонъёс шайтанъёс кадь шутэтско но юмшало! Ӵукнаозь! Нош ӵукна сайкало но тулыс сяська тусын дышетскыны кошко. Эстонъёс самоироничноесь. Соос уг возьдасько асьсэ яратоно чорыг сиёнзы, аспӧртэм кылзы, куазьзы сярысь серекъяны. Соос уг ярато чик юнме вераськыны, тужгес но кудӟытозязы. Кӧня ке ӟузьыны шедьто ке, ымзэс уд пыдса ни: «Удмуртъёс – милям родняосмы», «Ойдо кырӟалом эстон патриотической кырӟанъёс», «Песянайме Сибире келязы», «Тон самой ӟеч адями дунне вылын! Тон мынам удмурт сузэре! Ум люкиське, ум люкиське, ноку но ум люкиське! Сябась!» Эшшо соос, удмуртъёс сямен ик, тодмотэм адямиослы уг оско, мурт каро, но одӥг пол сазь дыръя тонэ эш каризы ке – пыраклы! Таяз аре мыным кылдӥз синмаськем эстон синъёсты адӟыны, эстон курыт синкылисты ӵушылыны но эстон кӧтӝожез кылзыны.

 

8. Мар, бон, сиыса отын улӥськоды ни?

Зависит, кыӵе туннэ нунал: толэзьлэн кутсконэз яке пумыз. Кутсконэз ке – авокадо, пицца, сок, ческыт сиён. Куддыръя ресторанын, кафеын, столовойын. Толэзьлэн пумыз ке – гречка но ву. Дорын.

 

9. Мар-о, общагаын улӥськоды-а?

Оо, 5 этажъем общагаын, кудӥз тусызъя Ижысь куд-ог квартираослэсь но тузигес. Татын уло в основном адямиос. Кӧня ке чонариез адӟи, но одӥг но таракан улон сюресэ вамен ӧз на поты Тартуын! Куноос котьку но быгато лыктыны, инты вань ке (ӧвӧл но ке) изьыны. Кылсярысь, Алинае проблематэк мон дорын улӥз толалтэ. Туала комнатаям капчиен тэроз кык УдГУ общагаысь комната. Оглом блокын 3 комната, 5-6 муртлы. Милям вань 5-6 муртлы (!) кухня, душ но сьӧрос. Куд-ог комнатаос мынамезлэсь но бадӟымгес, кылсярысь, Настялэн. Ми отын куддыръя Настялы «Эктон корка» ӝыт радъяськом, куке солы тапыртон дышетыны кулэ. Эшшо общагаямы 1-тӥ этажын вань 5 стиралкаен но 5 сушилкаен прачечной, кытчы котькин общагаын улӥсь быгатэ пырыны комендалэн пыд дорозяз йыбыртытэк (но 2 евро тырыса)! Со сяна, 5-тӥ этажысь сю пол лифтэн медад васькылы шуыса, интернет агай котьку шумпотыса возьматэ, вань-а али прачечнойын буш машина яке ӧвӧл но кӧня минут ортчыса бушез луоз. Нялтас вераса, комендамы – зарни кышномурт! Иронитэк. Мынэсьтым блокме, кытын 3 адями гинэ, со вань сюлмыныз яратэ. Туж оскеме потэ, мон поннагес шуыса, но сюлмы шыпыртэ: 2 мусолэсь но мусо, чеберлэсь но чебер, французлэсь но француз пиосы понна. Бен! Нылъёс но пиос капчиен одӥг блокын уло. Проблематэк!

 

10. Диссер гожтӥд ни?

Мае гожтӥ?

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер