"Шунды сАлянка — 8", Сеп гурт

21-тӥ апреле Эгра ёросысь Сэп гуртын сӥлы каризы аспал эшсэс Ольга Тронинаез. «Шунды» огазеяськонлэн тӧроез но егит кылбурчи вордскем гуртаз творческой ӝытсэ ортчытӥз. Татын ик жингыртӥз «Шунды сАлянка» ужрад – Ижкарысь егитъёс Эгра ёросэ куное вуылӥзы.

Сэп гурт котыр ласянь синмаськымон: татын улӥсьёс кырӟаса-вераса куно пумитало, ӝӧк выл тыр сиён-юон пукто. Эсьмаса, куазь та нуналэ небыт, шундыё кариськиз.

Сеп гурт паймытӥз милемыз кырыж, вылӥе учкись кранъёсыныз

Сеп гурт паймытӥз милемыз кырыж, вылӥе учкись кранъёсыныз

Тани таӵе гожъямъёсты луэ адӟыны школа борддоръёсын

Тани таӵе гожъямъёсты луэ адӟыны школа борддоръёсын

Шаерысьтымы удмурт егитъёслэн «Шунды» огазеяськонэнызы кивалтӥсь Ольга Тронина гурт калыкезлы но вань люкаськемъёслы кылбур чуръёссэ лыдӟиз.

Оля – егит кылбурчи. Та вакытэ дышетске Удмурт кун университетысь удмурт филология факультеысь витетӥ курсын. Туннэ нуналлы кык кылбур бичетэз потэмын. 2007-тӥ арын лыдӟисьёс кие вуиз «Кытын мынам ошмесэ?» сборникез, нош 2011-тӥ арын – «Йыромем йыртэмась».

IMG_0916

"Йыромем йыртэмась", 2011

Самой та выль книгаезлы сӥзьыса, гуртаз эшъёссэ но вайиз – «Удмурт Элькунысь егит артистъёсты» (афиша). Тросэз соос пӧлысь пырисько «Шунды» огазеяськонэ но ӵем гинэ гуртъёсы потало «Шунды сАлянка» нимо концерт-позыръяськонэн. Кемалась ик потэ вал ини веръяме-шӧмъяме «шундыё шыдэз». Мыным но тани шуд усиз.

IMG_0752

Клубе пырыку нырысь ик афиша син шоры йӧтӥз

Калык каллен люкаське, нош Оля, шӧдске, тулкымъяськыны кутскиз ни – сценарий пыр-поч гожтэмын ӧвӧл. Уго нылаш туннэ гинэ Мускоысь конференциысь бертӥз, дырыз но ӧй вал рос-прос малпаны ӝытлэсь мынэмзэ, лэся. Сцена вылын берпуметӥ дасяськонъёс ортчо: кин ке кырӟа, кин ке эктэ, гитаралэн но барабанлэн шудэмзы кылӥське. Учкисько, Оля, сценарий вылэ киыныз шонтыса, шокчиз но сцена вылэ вамыштӥз, кылбурзэ лыдӟиз. Зал чабе. Кызьы, бен, уз чабы? Асьсэлэн будэтэм нылашсы ук та.

Оля бере сцена вылэ потӥз фин-угор дуннеысь тужгес но чебер нылаш Ксения Воронцова. Ксюша бере рэп лыдӟеменыз паймытӥз Лёша Софронов. Соос бере сцена вылэ потазы на Дима Софронов, Таня Титова, эктонъя «Модус» группаысь веськрес нылъёс, Ваня Белослудцев. Юля Керенская «Уйвӧт» группаеныз тодматӥз.

Тужгес шуныт кичабонъёсын пумитазы «Зарни перепеч» премилэсь вормисьсэ – Николай Анисимовез. Ымзэ усьтыса но уг вуы, зал пуштэ кичабонъёсын! Со вӧзын чебер адскизы на Ксения но Дарья Воронцоваос.

IMG_0902

Дарья Воронцова, Николай Анисимов, Ксения Воронцова

Ужрад пӧрмиз кадь! Олямы доры кузь черод люкаськиз – ваньмызлэн ӟечкыламзы потӥз аспал эшсэс. Калык пӧлын шыпытак сылэ егит кылбурчилэн анаез Алевтина Леонидовна, кияз ӵуж сяська но нылызлэн кылбур бичетэз. Оляе будэ… Кылбуръёсыз небытэсьгес, лякытэсьгес луо. Егит кылбурчилэсь лулпушсэ анайлэсь ӟечгес кин шӧдоз!

IMG_0806

P.S. Позыръяськон но тузи ортчиз. Но, зэмзэ вераса, трос эктыны ӧй ни чида. Коля борды кыӵе ке дедуш ериз, нош мон, кӧттырмонам серекъяса, кошки эшъёсыным гитараен кырӟаны.

Гожтэмын юри "Удмурт дунне" понна
(тупатӥз Дарали Лели)
http://udmdunne.ru/wp-content/uploads/2012/04/ud59-24995.pdf

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер