Шаркан нуналъёс

Азьланьтӥсько «Пузкар» кино сярысь мадёнме. Куинь нунал талэсь азьло ми шонтӥмы Шаркан ёросысь Ляльшуре гуртысь сценаосты лэсьтыны. Туннэ ӝыт гинэ вуим. Та кык-куинь нунал мон понна гинэ ӧвӧл, быдэс съёмочной группалы, арня кадь потӥзы, дыр. Вазь ӵукнаысен бер ӝытозь ужамы. Куд-ог тужгес но секыт сценаосты пуктӥмы. Табере ваньзэ бӧрсысь бӧрсе…

Мыноно луиз милемлы «буханка» автобусэн. Банкае сылалтэм огречъёс сямен пуксимы но сюресэ потӥмы. Кин ке пуке, кин ке выж вылын ик сумкаос пӧлын изе.

 

Гуртэ 2 час ортчыса вуимы. Мылкыт куашказ – Мегафон уг куты бере, интернет уз луы, озьыен Твиттере иворъёсмес гожъяны ум быгатэ. Йырам люкаса-люкаса ваньзэ ветлӥ ни. Одӥг мылкыд мукетыныз ӝог воштӥське. Ӝокыт но кырсь кар бере гадь тыр шокаса сылӥськом. Шарканэз Удмурт Швейцария юнме уг нимало, дыр. Гурезьёс, нюлэсъёс, инбам но чылкыт омыр оскыто татын зэм но куке-соку алангасаръёс улӥллям шуыса. Чебер суредъёс но ӟеч калык синмаськытӥзы, дыр, Петырмес та ёрослы. Гуртысь гуртэ, урамысь ураме, коркась корка ветлӥмы кино пуктыса. Ляльшур калык паймемын, нылпиос котыртӥмы ялан великен ветло «Мар таос даурто ай» шуыса. 

Нырысетӥ нунал ортчиз радъян уж бордын: шедьтоно Стрелок кучапиез – соин тодматсконо но выль нимезлы дышетоно (!), бусыосты, коркаосты учконо, тупасьсэ шедьтоно, сиён но изён инты сярысь сюлмаськоно. Ӟеч шаркан калык трослы капчиятӥз ужмес, котькин но мыло-кыдо быгатэмезъя юрттӥськиз.

Вирнуналэ ньыль сценаез пуктыса вуттӥм (пусйи вал ини http://zangarik.ru/blog/guzhem-tylsios/ 2-3 сценалэсь тросгес нуналаз туж секыт пуктыны). Стрелокмы капчиен выль нимызлы дышиз. Азьло со Пират, пе, вал. Выль кузёоосыз доры тэтчаса ик бызьылӥз кадрын. Зэмос артист!

Азьланяз – одӥгес секытэз сцена. Ын пушкын чупаськон (!!!) Тодӥсько на ай, кызьы Петыр «Узы-борыысь» та выллем сценаосты курла вал. «Со неэтично». Нош таяз чупаськон гинэ ӧвӧл, валесын сценаос но вань! Кӧня ке палэнэ кошкыса, пусъеме потэ Юмшан57 гожтӥзы ни та сярысь http://vk.com/wall-1966810_2732. Луоз! Ӝоген луоз! Кӧснуналлы малпам! А кин отын шудэ – вот соиз секрет! Берытскомы съёмкае. Чупаськон сценалы (кинлы тунсыко) лэсьтӥзы 13 дубль, 3 пӧртэм кадръёсысен. Валтӥсь героймы арня пала атасъяськыса ветлӥз, нош дырыз вуиз но….. «солэн чупаськемез уг луы», - йыркуръяське валтӥсь героиня. Эсьмаса песянаез шудӥсь актриса но дышетыны кутскиз егитъёсты: "ми огшоры взасос гинэ чупаськиськом вал"! 

Секыт ужан нунал бере кӧня ке шутэтскыны но яра: бертыса ӧм вуэ, кырсь бакаос/эбекъёс сямен мунчое тэтчаса кошким.

Туннэ эшшо ньыль сценаез вормимы. Нуналэн-а удалтэм, актёръёсын-а, оло инбамысь юрттэт вуиз-а, но съемкаос капчиен ортчизы. Щепкин нимо вылӥ театральной училищеын дышетскисьёс сяна милемлы юрттӥзы на Удмурт йӧскалык театрысь артистъёс но – Романов Пётр Михайлович но Краснопёров Вячеслав Николаевич. Пётр Михайлович шудэ колхозлэсь председательзэ. Шӧдтэк шорысь тодӥмы поляк кылысь председатель – «керовник» луыса берыктӥське шуысаю. Кин мае кылэ.

IMG_1388

Ватсаме потэ, та артисъёс сяна, съёмкаосы пыриськизы ини тетатрысь Пислегов Сергей Михайлович («Ижевская правда» газетлэн валтӥсь редакторез), Николаева (Перевозчикова) Римма Павловна (Кузебай Герд нимо йӧскалык гимназилэн директорез), Моисеева Валентина Михайловна (валтӥсь геройлэн анаез), Людмила Егорова («Ижевская правда» редакциысь подъясь).

Вуимы Ижкаре уйин, нош ик банкаысь сылалтэм огречъёс кадь. Но зато шулдыр!

Таин ваньмыз. Тыршо азьланяз но маке-сое гожтыны на :)

IMG_1581

IMG_1666

IMG_1471

IMG_0019

IMG_0035

IMG_0051

IMG_0962

IMG_1058

IMG_1134

IMG_1702

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер