Rīga

Лымы усе. Эстон шаере но тол вуиз. 7.30. Малы мон уг изиськы Тартуын шуныт валесам? Сылӥсько Таллиннысь Balti jaam вӧзын но инмбамысь, погмаськем ымнырме вешаса, ненег, тӧдьы мамык усе. Кинлэн ке вордскем нуналыз, соин йырин кытысь ке кылдэ Hennessy но сӥльын перепеч. It made my day. Улонмы майбыр – ӵукна Таллиннын сайкаса, перепечен виски шӧмъяса Ригае мынӥськом.

Рига – Латвилэн шоркарез. Быдӟалаезъя Ижкар кадьгес. Татын ышыны шуг, шуг-секытэн но пумиськыны шуг, уго котькин вала ӟуч кылэз. Пельтӥд пар поттыса англи кылын вераськыны тыршид ке но, тыныд ӟуч кылын берен вазёзы. Кӧня ке статистика:

Латвиын:

61,4 % латышъёс

26 % ӟучъёс

Озьы ке но:

92 % быгатэ вераськыны латыш кылэн

98 % быгатэ вераськыны ӟуч кылэн.

Кышкыт. Кин пайме та статистикалы Википедиысь ке но учке, малы сыӵе югдур кылдӥз. Асме эксперт шуыны уг дӥсьтӥськы, м.к.ш. Латвилэн историезъя курсъя тестме сётыны ӧй быгаты на.

Латышъёс но эстонъёс куспын ялан «Кин тузӥгес улэ?» вожвылъяськон мынэ. Эстонъёс вормо, уго соослэн гурезьзы но ӝужытгес, шуръёссы но паськытгес. Одӥг гинэ мактаськонзы Латвиын улӥсь калыклэн – шоркарзы тужгес но бадӟымез Прибалтикаысь кар луэ. Туууж данъясько соин. Vecrīga (XIII дауре кылдэм Ригалэн вуж люкетэз) 1997 арын ЮНЕСКО списоке но пыртэмын вал, нош 2014 арын Латвилэн шоркарез – Европаысь лулчеберетъя шоркар лыдъяське (Быги гуртмы кадь ик).

Нырысьсэ Ригае мон вуылӥ коньывуонэ. Висёнэным-а, Шумиловалэсь мӧзмонэным-а, йырпорымон синмаськонэным-а йырин мыным та кар чик ӧз кельшы: урамъёс укыр кырсь, калык трос ӟуч кылын вераське, улон интымы кезьыт, шуш но вуж, нокыныт вай-фай ӧвӧл (Эстониын куддыръя дунтэк интернет герӟетэз нюлэскын но шедьтыны луэ). Кыӵе «лулчеберетъя шоркар»? Со огшоры шуш советской кар. Нош али! Пиоспуос пужмертэмын, Выль ар вуэмен Ригаез гирляндаосын чеберматӥллям. Уйин воксё выжыкылэ сюрем кадь потӥ. Кӧня ке гинэ Рождестволы сӥзем кырӟанъёсты бӧксыны ӧй кутскы. Вуж городын «крисмас маркет» усьтӥллям ни. Котькытысь «labdien» (удм. ӟечбур) кылӥське, глинтвейн зын лыктэ. 30 шуркынмон – адвентлэн (учкы Википедиысь) нырысетӥ арнянуналэз, соин ик котькытын 5 сюсьтыло тугокоос вузасько. Кафеын сьӧд сутерен Рижской бальзам веръяськом – «Priekā» (удм. сябась).

Нялтас вераса, Россиын улыкум мон понна Латвия но Литва куспын нокыӵе пӧртэмлыкез ӧй вал. Зэмзэ ке, мон чик номыре но та шаеръёс сярысь ӧй тоды. Малпаськоды мон шузи? Мон сяна ӝыныез Тартуысь студентъёс али но сурало та кык кунъёсты. Литваысь эше серекъя: «Latvia or Lithuania – who cares?» Кин меда шуак быгатоз вераны, кыӵе кыл семьяе пыро та 2 кылъёс? Хоть ыбе! Эстоние лыктытозям мон малпай со славян кылъёс шуыса!!! Ярам коть визьмы тырмиз та «тодонме» ас пушкам гинэ возьыны. Огпол верась луи интонацизы туж тупа ӟуч интонацилы шуыса. Эше кылзэ ик паймыса куртчиз кадь. Латышской но литовской кылъёс нимаз кыл группа кылдыто, тужгес но тодмо вашкала ӵыжы-выжызы прусской кыл вылэм (но со ышиз-быриз... ми соосты валаськом но жаляськом!)

Нош маин латыш кыл милемлы, финн-угоръёслы, тунсыко луыны кулэ? Вашкала латышъёс туала улон интыязы лыктыку, та территориын финн-угор калыкъёс уло вылэм ини. Дыр ортчемъя огез финн-угор люкет эстон кылэ пӧрмиз, нош мукетыз – лив кылэ. Жаляса верано берпуметӥ пиосмурт, кудӥзлэн анай кылыз лив вал 2009 арын кулӥз, нош туннэ нуналлы дунне вылын 200 адями та бырись/бырем финн-угор кылэз тодэ. Инмар кужым сётӥз ке но ас дыраз дипломе басьтӥ ке, оло, мон но ветло гужем лив курсъёсы.

Лобӟиськом берен Ригае... Малы меда ми татчы лыктӥм? Татын, пе, Латвиысь ӧжыт лыдъем калыкъёслэн нимаз ассоциацизы вань но соос арлы быдэ пумиськон фестиваль радъяло. Милемлы шуд («шуд» кыл ирониен кутэмын) кылдӥз 12тӥ фестивалязы лыктыны. Шумпотымон – ми тужгес но дуно куноос вал (нош милемын Лади Мари!), концертсы кык кылын мынӥз. Ӝожтӥськымон – залын ялан кин ке ӟуч кылын ваньзэ комментировать карыса пукиз, сцена вылын (почти) егитъёс ӧй вал (озьыен пичи калыкъёслэн лулчеберетсы арлыдоослы, пурысьтаны кутскем йыръёслы гинэ тунсыко), выступлениослэн уровеньзы туж улӥын вал. Мон ӵошатысал концертсэс Удмуртиысь ёрос концертэн. Зэмзэ ке, ми но милемын лыктэм украин кышномуртъёс гинэ йылолъёсты тодӥсь но валась зэмос фолк группаос вал. Серекъялод-а бӧрдод-а, Европаысь лулчеберетъя шоркарын радъям концертэз Удмуртиысь ёрос концертэн ӵошатыны луэ шуыса. Соослы со комплимент мед луоз :)

 

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер