пичи Арсюша

Гужемлэн берпуметӥ толэзяз ке но быгатӥ тани гуртэ 4 нуналлы бертыны. Кыӵе анай-атай вӧзын умой вылэм, соку ик вунэтӥ, кӧня мыным арес, вунэтӥ мон университетын дышетсконме йылпумъяй ини шуыса, йырысьтым тӧлӟиз школаын дышетскисьёсы мон доры нимъя-тулъя вазисько шуыса.. коркатӥ-азбартӥ пичи нылаш сямен лӧптыса поръясько. Анаен быдэс нунал ужам-бергам бере, телевизор азе пуксимы (зэмзэ ке, мон али но уг тодӥськы, кызьы сое лэзьыны, укыр мудрон), нош отын семья сярысь кыӵе ке передача учкимы. Анае тодаз ваиз мынэсьтым вордӥськонме.. Татын вакчияз палэнэ кошкыны кулэ.

Семьяямы 3 нылпи – мон сяна 2 агае. Мон вордӥськыку одӥгезлы 10, мукетызлы 12 арес вал. Анае монэ 37 аресаз ваиз. Озьыен, анай-атаелэн кубистаысь ныл шедьтэмзы потэ вал ни, вылды.

..«Роддомын тонэн кылльыкум отын кышномурт вал, кудӥзлэн 2 нылыз вал ини. Со куинетӥзэ пияны малпам, пи луоз шуыса, нош вордскем ныл. А мон тонэн ветлӥсько вал али. Одӥг нунал со доры палатаяз пырисько но серекъяса шуисько: «Тани мынам нош ик пи вордскоз но ми тонэн воштӥськомы», нош соиз уууг, пе, шуэ, аслам ик нылы мусо йӧтэ ни. Соку рентген валан ӧй вал. Мон пумозяз пи вордскоз малпаса улӥ».. А вордски мон! :) Анае егит дыръяз спортэз яратэ вылэм. Институт понна но куасэн нискыламез вань. Валасько, монэ вордэм бере тазалыкез уката но уродмиз. Уго арлыдыз вал ни. Озьы ке но, ӧз кышка. Соин ик яратоно мамаелы тау шуисько! Быгатэмея доре дыртӥсько, бурд улаз.

Тае вакчияк нырысь вераме потӥз, нош постэлэн пуштросэз воксё мукет адями сярысь луоз. Вань мынам эше – Оля. Со мынэсьтым кык арлы бадӟымгес, озьы ке но, ми ӵош будӥмы. Корказы но матын сылэ, укноосмы ог-огзылы кырмышъяло палэнысен. Анаез – мынам кирос анае. Оля мыным апаез воштэ вал, нош ӵыжы-выжы герӟетъёсыз сэрттоно-пертчоно ке, песятаелэн атаез но Олялэн ӵужатаезлэн анаез ог-огзылы сузэр-агай луо вал. Озьыен эше зэм но мыным апай вал. Оля йылпумъяз удмурт кылосбур факультетысь англи ёзэтэз, 2 ар ортчыса мон но. Ӧй, мон солэн сюресызъя ӧй мыны. Озьы пӧрмиз гинэ. (фотоын: 2008тӥ ар, Оля али бертӥз Хельсинкиысь ИФУСКО конференциысь, нош мон школаез йылпумъясько)

ddd

qqq

qqqq

Кельшоз-а эшелы уз-а, татын мон вакчияк улонысьтыз берпуметӥ 10 арез сярысь гожто. Кызьы ке 8-9тӥ классын солэн туганэз кылдӥз. Малпаз-а соку Оля, та туганъяськон ӝог уз быры шуыса? Арысь аре со мыным кыл сётэ вал, соос ӝоген люкиськозы шуыса. Мыным то дунне вал. Оля Ижкаре дышетскыны кошкиз – Сеня возьмаз, мӧзмиз. Сеняез армие басьтӥзы – Оля возьмаз, мӧзмиз. Сеня бертӥз армиысь но нош ик Оляез возьманы кутскиз.

ww

Куддыръя, Ижын пумиськылыкумы (мон соку ФУдФ-ын дышетскисько вал ини, Оля сямен), эше вера вал, соос люкиськизы, кадь, шуыса. «Ӧйтӧӧӧд..», – малпалляй мон. Университет бере, паймымон, но Оля гуртмылы матысь Елабуга каре улыны выжиз, отын дышетӥсь луыса ужаны кутскиз. Ар ортчыса сюресэз сое гуртамы ик ваиз, школаямы англи кылъя дышетӥсь кулэ вал. Бертакум серекъяса юалляй «Сеняен люкиськиды-а ини?», но ответсэ сотэк но тодӥсько вал ини: «Люкиськод на табере соин», – мыняса вера вал эше. Но сюан сярысь номыр кылэмез ик ӧз поты. Эрикез дуногес вал. Со вакытэ тыбыр сьӧразы 9 ар ӵош кылиз. Гужем вуэмен оломар егит нылкышнолэн йыраз чигиськиз. Улонзэ 180 градуслы воштэмез потӥз: гуртысь школаын ужзэ кельтыны, кошкыны Ижкаре яке эшшо но кыдёкыгес, пырыны магистратурае яке аспирантурае. Одӥг кунгож сьӧрысь университетэн герӟаськиз дышетскон пумысен но...... тодӥз со пияно шуыса.

Куанер, куанер эше. Кин гинэ тодэ, меда, кыӵе солы секыт вал!.. Кыӵе витьымтэ, возьмамтэ ивор та вал! Оля чик талы дась ӧй вал на. Йыраз олокыӵе пӧртэм малпанъёс но лыктылӥзы.. Инмарлы тау, со шонер сюрес бырйиз! «Тунсыко» иворез мон бер тодӥ. Дышымтэ асьме калык сыӵе шумпотон иворъёсты ог-огзылы шара вераны. Урамын кезьыт тӧл пялляку, нылпиос дӧдьыен гурезьысь нискылаку, вуи мон ӵош будэм эше доры. Нош отын... бадӟым, питырес Оля. Котырес ымнырыз пиштэ шумпотонэн. Та нылашен пичи дыръя ми нюлэсъёстӥ бызьылӥмы, соос дорын «Секретные материалы» сериал учкылӥмы (пеймытын, тылтэк, кышкаса!!), со дышетӥз монэ синлысъёсты буяны, мон сое выпускнояз бичаку, гижызэ лакен буяй, со монэ китӥм нырысьсэ университетэ ваиз... мар гинэ ӵош ӧй вал?! Нош али со – таза, шумпотонэн пачылмем мумы-ӵӧж кадь – азям пуке но мыня, чай понэ кема возьмам кунолы. Со ӝытэ кема вераським. Тужгес но секыт вакытэз ортчем. Али со анай луыны дасяське. Кошкыкум эшме ӟыгыртӥ но шӧдӥ, кык адямиен ӟечъяськисько ни шуыса.

Оштолэзьлэн кутсконаз Финн шаере кошконо луиз. Тодӥ, эшелэн пинал ваён дырыз матэктэ ини, но малпай со дырозь берто на Удмуртие шуыса. Витьымтэ шорысь Интернет пыр Олялэсь гожтэт вуэ «Ӟечкыланы быгатӥськод! Мон пияй», 11тӥ оштолэзе зарни комокмы вордӥськем!! :) Чик витьымтэ шорысь мыным та ивор кезьыт вуэн пылатэм кадь луиз! Хельсинки кар шорын, уин мон тодӥ мынам эшелэн пиез вордскем шуыса.

sss

IMG_7233

Ижкаре вуэм берам, лобӟыса гуртэ бертӥ. Со ӝытэ ик пичильтыкен тодматскыны дыртӥ ни. Макем мусо со мыным потӥз! Соку солы 8 нунал гинэ вал.. Нош али! Туннэ эше куное вуылӥз 4 толэзьем батыреныз. Арсений чиньыосме соку ик юн-юн кырме пичи киосыныз. Мон шоры сак учке, котыр дуннез эскере, маке тодмотэм корка шуыса. Витьымтэ шорысь пиньтэм ымыныз мынектээээ.... Оооой! Кыӵе ӧжыт кулэ шумпотонлы! Нош Оля.. Сыӵе шудо анаез шедьтод на меда? Вань шугъяськонъёс али вунӥзы ни. Атайзы, Семен атайзы, пизэ яратыса сиыыны рад, дыр :) Кылсярысь, Арсений ним Сеня ачиз бырйиз, трос ар талэсь азьло :) Соку ик тодэ ни вал, дыр, нырысь ик пизы вордскоз шуыса.

Тьфу-тьфу-тьфу, сюлмы гань-гань луэ семьязэс адӟыса. Нош сюан. Олялэн быземез уг поты вал бере, озьы ик пӧрмиз, сое бызьытӥзы юатэк :) Пизы вордскем бере, сое регистрировать мынӥллям но, кызьы ке Оляен Сеняез кузпалъяллям отын ик. Оля шуэ, валаса ик, пе, ӧй вутты. «Туж умой», – серекъяй ас поннам, вуттысалыз ке, оло ӧд но бызьысалыд :)

IMG_5008

Малы тае ваньзэ гожтӥ? Куддыръя, возьмаськод улонлэсь одӥгзэ, нош пӧрме воксё мукетыз. Оло анае но, кыкетӥ агайме вордыкуз, берло пияны уг малпа вал ни? Оло уг но оскы вал ни ныл вордскоз шуыса, нош али тани мон татын, блогам маке йыртэмъяськисько. Олялэн но мукет планъёсыз вал но, нош улон ас сямен ваньзэ каре. Кутӥз но, кузьмаз эшелы яратоно, шӧртчи пизэ.

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер