Паймымон Даша

Даша Слесарева – 2010тӥ арын Удмурт кун университетысь кунгож кылъёсъя но литературая институтэз йылпумъям нылаш. Али “Get together” нимо англи клубен но англи кылъя курсъёсын кивалтэ. Кык ар ортчыса, мон со мында лэсьтыны быгатӥ ке, туж шумпото!

Нырысьсэ Даша сярысь мон эшъёсылэсь кылӥ, соку ик соос дэмлазы соин тодматскыны. Со бере одӥг гинэ толэзь ӧз ортчы ни. Али кема ӧвӧл контактысь адӟи ивор : “Get together club” табере "Перепеч.кин" кафеын, пе, люкаськылоз. Соку ик гожтӥ Дашалы, ойдо пумиськомы но тодматскомы шуыса, уго трос юанэ солы люкаськиз вал ини. Пумиськеммы нырысетӥ пол но, кыкетӥ пол но ӧз пӧрмы.. Улон манермы кыкнамылэн но сыӵе – быдэс нунал дунне-питран ялан бергатэ но бергатэ, куддыръя тырмыт изьыны но ум вуттӥське..

Улон яратэ адямиен шудыны – чик витьымтэ шорысь нырысьсэ улэпкын университетын пумиським. Соку ик малпам: матысь дыре ик "Перепеч.кин" кафее вуылоно. Туннэ гинэ ветлыны пӧрмиз ай.

Даша Слесарева

Та паймымон горд йырсиё нылашен ми кык но ӝыны час ӵоже вераськыса пукимы. Чаймы но кемалась сӥяз ни, заказтэм перепечъёс но сиемын ни, нош вераськонмы нокызьы уг быры. Макем ми соин ог-огмылы кельшиськомы вылэм. Со вакытэ ик, мыным трос дышетсконо на, Даша кадь дӥсьтӥсь но кышкасьтэм луон понна.

Университетэз йылпумъяса нылаш ассэ улонын ӧз ышты. Ар ӵоже Муское но ветлыса вуттӥз, но ӝог валаз, Ижкар сое берен возьма шуыса. Удмурт шаере бертыса Даша кемалась йыраз возем малпанзэ быдэстӥз – усьтӥз англи кылъя клуб. “Get together” клуб ужа таӵе амалъя: котькуд пумиськонлэн аслаз пуштросэз вань. Кылсярысь куддыръя соос ишанъёс сярысь верасько, яке апокалипсис сярысь, яке кенешо маин Россия но Америка ог-огзылэсь пӧртэм луо. Нылмурт вера: «Нырысь пумиськонэ лыктӥз 4-5 адями, собере 10, нош кӧня ке дыр ортчыса мон валай 70 адями азьын сылӥсько, но соосын  али мае ке радъяны кулэ шуыса». Клублэн уженыз ӵош огвакытэ радъямын вал англи кылъя курсъёс но, кытчы котькуд мылкыд карись адями быгатэ лыктыны. Али 4 группа ужа, но Выль ар юмшанъёс бере Даша малпа эшшо кӧня ке группа люканы. Озьыен лэсьтӥсько ваньдылы реклама: АНГЛИ КЫЛЭЗ ДЫШЕТЭМДЫ ПОТЭ КЕ, ТА НЫЛАШЛЫ ВАЗИСЬКЕ http://vk.com/id2230752.

Даша Слесарева

Малпано ке, егит нылаш огназ сомында уж лэсьтэ, уго кивалтыны капчи ик ӧвӧл. Малпаськоды таин солэн нуналэз быре-а? Чик ӧвӧл. Таяз аре Даша университетэ магистратурае дышетскыны пыриз на. Со сяна, клубезлы “Get together” сӥзем сайтэз нуэ. Отчы англи грамматика сярысь , кылэз капчигес дышетон амалъёс сярысь статьяос гожъя. Мон ваньзэ вераны но уг быгаты, мар со сайтын вань, асьтэос учке ни http://togetherclub.ru/.

Оглом вераса, пумиськонмы удалтӥз, малпасько, кыкнамылы но пайдаен. Лӧптӥсько сыӵе узыр пуш дуннеен, аспӧртэмлыко но визьмо адямиен тодматскемелы. Оскеме потэ, эшъяськонмы юнмалоз на ай шуыса! :)

P.S. Вераме потэ на, Дашалэн ӵыжы-выжыосыз пӧлын удмуртъёс, пе, вань!

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер