Нюлэскысь потӥд-а мар-а?

"Тон нюлэскысь потӥд-а мар-а?", - юало милесьтым, куке ми мае ке ум тодӥське, ум валаське туала улонын.

Тумошо, но зэм, ми - удмуртъёс - нюлэскысь потӥм! Куке но... кемалась. Али урбанизация золгес но золгес ортче. Тужгес но берло аръёсы. Озьы ке но, висись, курадӟись удмурт сюлэм котьку ас выжыосыз доры кыске. Басьтӥськод матысь автобусэ билет (Олег Четкаревлэн повестьысьтыз героез сямен) но шонтӥськод вордскем гуртад: бусыосы, возьёсы, тэльёсы, писпуос но музъем доры.

Быдэс улон инкуазен герӟаськемын! Пичигес дыръям атае монэ, куддыръя кужмын, куасэн нискыланы гурт сьӧрысь нюлэскы нуэ вал. Синмы ляб адӟе бере, шуылӥз: "Синмыд мед ялкароз. Кыдёке котырак учкы, пужымъёслэсь инбаме ӝутскем пумъёссэс адӟыны тыршы. Шока вӧл-вӧл". Но мон учкисько, шокасько вал.. Чар-чар кезьыт омыр нырез бичатэ! :) Нылпи ке но шӧдэ вал, кыӵе сюлэм гань-гань луэ. Куанер атаелы мыным инкуазез яратон мылкыд пыӵатон но тазалыкез кыдатон сяна, тросгес аслыз шутэтскыны кулэ, дыр, вал инкуазьын. Отын, кытын тылобурдо но пӧйшур синъёс сяна тонэ нокин уг адӟы.

Сӥзьыл вуэмен но нюлэсэз ӧм вунэтылэ. Арнянуналэ, куке бакча ужъёс быремын ни, нош лымы ӧвӧл на, картошка, нянь, сылал но йӧл сумкае поныса пыдын потӥськомы вал сюрес вылэ. Ветлӥськом. Ӵужо-гордо куасьмем куаръёс ӵашшштыр пыд улын вазё. Мон соосты бичалляй, книга бамъёс вискын куасьтылӥ. Али ӟуч-удмурт кыллюкамез киям басьтӥсько но бамъёсты берыкъякум пичиесь, чебересь куасьмем куаръёс киям усё. Кӧня ар меда соос монэ отын витизы ни? Мед эшшо витёзы на.. пичи дырме тодам вайыса. Тылскем, картошка пыжем бере, куке кисыос турын-куарен тырмыт ини бертыны потӥськом. Анай дорын возьма. Печення пыжиз, зынзэ урамысен ик шӧдисько ни. Корка пушкын шуныт. Ческыт, анай киын лэсьтэм печенняез сиыса, выль букваосты дышетылӥм, гожъяськыны тыршылӥм. Номыр паймонэз ӧвӧл нырысетӥ классэ лыктыкум мынам лыдӟиськеме но, гожъяськеме но луэ вал ини шуыса.

Сокем шуныт тодэ-ваёнъёс..

Город (Иж ке но) воксё мукет ритмен улэ. Кузьыли сямен лумбыт бызьылӥськод. Нунал бӧрсьы нунал ортче. Сюлэм ӝог йыгаське. Машинаос сьӧры уиськыны тырше кадь. Инкуазь кырсь. Зор бере но. Ярам коть уйин кизилиос адско инбамын (бадӟым каръёсын соосты калык уг адӟы, пе). Шоркар улэ. Тон отын пичи шыр. Яке шырлэсь но пичигес. Куинь-ньыль арня озьы улыса син тэтчаны кутске, йыр висе, лулыд ӝуштэ, мылкыд ӝутонтэм куашкамын, малпанъёс сурамын-пожамын.

Гуртэ, гуртэ..

Отын витё яратоно анаед но атаед:

- Статьядэ лыдӟим Дартысь. "Нормальной" гожтэмед, нокин туматымтэ ни. "Йӧназ" кыл вань. "Йӧназ адями" шуо. Дорын ик редакторъёс уло, вылэм. :)

- Мама, ойдо ӵуказе губияны ветлом!

- Ойдо, мар ке потӥз, дыр, ни.

Ӵапак кылем арняе гинэ, "Пузкар" киноез Шарканын лэсьтыкумы, дыши великен ворттылыны, 21 аресын! Туннэ мактаськи. Кыӵе шумпотӥзы! Ӝоген гурт сьӧрысь посадкае вуим. Шыпыт. Тӧл гинэ лоба кызьпуос но кызъёс вискытӥ. Кытысь ке зэмос нюлэс палась тылобурдо куара кылӥське. Пель шутэтске. Шоканэ капчигес но калленгес луэ.

Воёгуби, шыргуби, коньыгуби, сальтырна (мамае палан "солёкӧ шуо)... Мар но ӧвӧл! Губи азьын уд пыдесъяськы ке, со тон азе уз поты, пегалоз! Тае мон пичи дырысен тодисько ай. Кыӵе ке выжыкылысь лыдӟи. Огпол лаптӥськод, нош соос ваньзы азяд пото, семьяенызы ик!

P1000770

Витьымтэ шорысь кенӟали пыд ултӥ бызьыса кошке.

P1000804

Дугды! Сьӧраз бызисько! Дугдӥз... Вите, уг но пегӟы ни, шайтан. Вала, дыр, мон сое туспукто гинэ шуыса. Мын, ас сюресыдъя мын, быждэ гинэ уть. Ярато монэ туннэ пӧйшуръёс но нымы-кибыос. Шедьтӥ вылысьтым ӟозэз. Ку тэтчем? Мынэ монэн. Кельшем, лэся.

P1000799

Берло аръёсы ӵем та интые вуылӥськом: узы-боры, губи бичаны, толалтэлы веник ишканы. Куддыръя огшоры гинэ но сюрес вылысь кожиськом. Син мед ялкароз шуыса. Тӧллэсь куаръёсын шудэмзэ кылзыны. Малпанъёсты огазеяны, бичаны. Уг быгато удмуртъёс нюлэстэк. Ветлы машинаен, ужа компьютер сьӧрын, котырты астэ телефонъёсын, айпадъёсын, си синтетик сиёнэз, нош кулэ дыръя инкуазь кыскоз тонэ дораз!

P1000796

P1000811

P1000817

P1000822

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер