Нырысетӥ табань пӧрмиз!

Ортчиз кема возьмам нырысетӥ «Элькуновидение» ӵошатскон. Кема возьмам. Кема дасям. Йылпумъянъёс лэсьтэмын, вормисез вань – Можга ёросысь «Пять поющих сердец» группа.

«Удмурт дунне» но нимысьтыз кузьым дасяз, сое утӥзы Александр Леонтьев но Ваня Белослудцев. Silent Woo Goore группалэсь мылкыдзэ шараяз усточи Толя Галиханов (тыршыса ик удмурт кылын вераськиз!), асьсэлэсь нырысетӥ «Toleze» дисксэс со кузьмаз «Гаруда» удмурт фолк-металл группалы.

Оглом ужрад мыным кельшиз. Ортчытӥсьёс юнме сюлмасько вал, нырысетӥ табань ноку но уг пӧрмы шуыса. Малпасько, табань но, перепеч но туннэ усто пӧрмизы! Малпанэз умой. Табере оскем потэ, ужрад арысь аре кужмоялоз, рос-прос пыд вылаз султоз шуыса. Кырӟасьёслэн но, радъясьёслэн но устолыксы юнмалоз.

Мон ваньзэ тодӥсь-валась ӧнерчи ӧвӧл – огшоры залын пукись, шутэтскыны лыктэм адями. Озьы ке но кырӟасьёслы, коллективъёслы вакчияк комментарий сётэме потӥз: кыӵе куаразы, кин кызьы дӥсяськем, кин мае кутчам.

Ужрадэз усьтӥз быдэс Элькунлы но, Россилы но тодмо шудӥсь-кырӟась Анна Плотникова. Малы сое ярато? Солэн капчи, задор мылкыдыз соку ик палаське котырысь адямиослы.

Анна Плотникова

Дэри ёрос – «Гаруда» группа. Котьку тузӥ. Брутальной воргоронъёс! Туннэ «Гаруда» куинь солисткаосын потӥз. Син шоры йӧтӥзы нылкышноослэн еоссы но Роман Симаковлэн чыртыысьтыз син усемлэсь чеберъянъёсыз.

Кияса ёрос – Марина Галичанина. Чебер, «мифлыко». Жаляса верано, берло дыре Марина сцена вылэ шергес потаны кутскиз. Нош мон солэн, кызьы шуод ай, фанаткаез-а, мар-а. Синме вошъятэк, учки сцена вылын кырӟась, паймымон нылкышно шоры! Эшшо вож туфлиоссэ синйылтӥ на… Ныл йыр!

Грак ёрос – «Мелодия» трио. Таосыз асламъёсыз бере, (мон но Грак ёросын вордӥськемын) комментарийтэк кельто.

Глаз ёрос – Александр Леонтьев. Та воргоронлэн мугорыз чик но чиед ӧвӧл ке но, капчиен тэтчамезлы котькудӥз эктӥсь вожъяськоз. Аслаз дартэныз, мылкыдыныз Леонтьев жюрилэн но, учкисьлэн но йыраз пыӵаз. Укыр ик нылкышноос лӧптыса чабизы…

Александр Леонтьев

Якшур-Бӧдья – Дмитрий Загребин.Дима «Чагыр синмо нылаш» выль кырӟанэныз калыкез паймытыны тыршиз. Пусйытэк уз луы: тыршыса кырӟаз. Озьы ке но мынам гинэ йырам ӧз лыкты, дыр, Дималэн мукет кырӟанэз – «Тӧдьы йырсиё нылаш». Озьыен, матысь дыре возьмано, дыр, «Льӧль ымдуро нылаш» яке «Курень куо нылаш» выль хитъёссэ… Кырӟанэз сяна, пенжакез но выль вал – чебер, вож, модной!

Дима Загребин

Вавож ёрос – Наталья Матвеева. Ачиз кырӟан гожтӥз, кырӟаз но чебер, но малы ке туж мӧзмыт потӥз…

Эгра ёрос – Иван Лекомцев. Куараез чебер, кырӟанэз но усто. Нош вылтусыз… Чилясь дэрем ог 15-20 ар талэсь азьло актульной вал, дыр. Яке со солэн сыӵе юри малпам стилез? Андрей Кабышевлэн кадь, лэся. Иванэн ӵош сцена вылэ эктон вылысь вить егит нылъёс потӥзы на. Бергакузы яке кизэс ӝуткакузы, мон пӧсьвуаськем кадь гордэктылӥ. Яке дэрем кузьгес кулэ, яке дэрем улэ маке дӥсяно на вылэм. Зэмзэ ке, пумозяз ӧй вала, малы та номер ньылетӥ инты басьтӥз. Мон ӧй вала, нош фанатъёсыз валаллям. Соос Ванялэн тырмыт!

Яр ёрос – Наталья Полянкина. Кырӟанэз туж задор вал, «трактор» сярысь. Минусэз – нош ик вылтус. Вот ум быгатӥське ми сцена вылэ шонер дӥсяськыса потыны. Яке 90-тӥ аръёсысь чилясь кофта, яке базарысь дэрем.

Наталья Полянкина

Пичи Пурга ёрос – Сергей Никандров. Та кырӟась сцена вылэ потыку ик, зал пуштӥз кичабонъёсын. Озьыен, али Николай Басковлэн выныз потӥз шуыса, оскыны дась вал. Чебер, учкымон воргорон. Кырӟанлэн «Чеберай» нимыз но сюлэм дымбыр-дым кароз шуыса оскытӥз… Ӧз кары. Оло Сергеез кыӵе ке чеберай куштэм-а, оло кышкаменыз йырин-а, но кырӟан туж ӝож пӧрмиз, нош сюлме номыр но ӧз пыӵа. Туж жаль.

Алнаш ёрос – Светлана Ипатова. Вот кин кадь луоно асьмелы, нылъёс, чебер, веськрес Света энергетикаеныз быдэс залэз шобыртӥз! Нырысь ик син шоры йӧтӥз Полина Kubista-лэн берпуметӥ коллекциысьтыз дэрем но чыртыкыш. Ипатова кык ар талэсь азьло «Чеберай» конкурсэ пыриськиз вал, соку ик та нылашез синйылтӥ. Зэм но, ӧй луысал ке Ксюша Воронцовамы, со интыын луысал Света Ипатова. Егит нылкышно кырӟаны но, эктыны но, дефиле возьматыны но усто, нош мусо пальпотэмзэ адӟыса, ачид но мынятэк уд чида!

Кез ёрос – Иван Белослудцев. Выльзэ номыр уг вера. Ванечка кырӟаз умой, но быгатэ эшшо но умойгес, ӟеч тодӥсько! Кырӟанлэн пумаз гинэ ачиз но сайказ, лэся, жаль, кырӟан быриз ни…

28. 11. 12 "Дарт"

http://issuu.com/udmdunne/docs/ud_178_25114_/1

Можга ёрос – «Пять поющих сердец» ансамбль. Калыкын – «5 Сергейёс». Ох, курлай мон группаез та нуналозь. Мон возьмасько вал «Backstreet Boys» яке «US5» выллем луозы шуыса. Нош соос воксё мукет вылӥллям. Сцена вылысь кошкемзы бере чилектӥз малпан: «Таос ик вормозы ай» J Вормизы!

Пять поющих сердец

Ужрад ортчиз, нош котькудӥзлэн залын пукисьлэн алслаз малпанэз кылдӥз шуыса, малпасько.

Мукет нуналаз адӟылӥ ӵошатсконлэсь огзэ радъясьсэ. Тусаз ик гожтэмын – ужрадэ со вань сюлэмзэ но, кужымзэ но понэм.

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер