Nordic Trip. Part I. Lapland.

Маке нокызьы Эстониын дышетсконэ сярысь гожтэме уг луы. Укыр трос веранэ, дыр. Куартолэзе ивортӥзы толалтэ Лапландие ветлыны быгатомы шуыса. Шайтан. Нош мынам дышетскон. Зэмзэ ке, гужем шунды сӥзьыл но кисьтӥз ай тылсиоссэ эстон музъем вылэ. Вож гуждор вылын погылляськыса, тол вакыт сярысь малпаськем но уг поты на вал. Германиысь бускеле - Юлия - Выль арлы мыныны дэмлаз. Сомында ар ӵоже мынам та уйпал шаере вуэме потэ вал, али нош кылдӥз. Сӥзьыл вакыт, вуэ сялӟем кадь, ортчиз но быриз. Толсурлэн берпуметӥ нуналъёсаз Tallinnk теплоход вайиз монэ Стокгольме.

Sápmi

Лапландия. Со малпам шаер. Солэн ӧвӧл кунгожъёсыз, азьмуртэз но конституциез. Но солэн вань калыкез - саамъёс. Дас пӧртэм кыл-диалектэн вераськись, соос Россилэн, Финляндилэн, Швецилэн но Норвегилэн тужгес но уйпал люкетъёсаз уло. Ас "шаерзэс" соос Sápmi шуо. Куншетсы, калык дӥськутсы кадь, лыз, вож, горд но ӵуж буёлъёслэсь кылдэ. Яркыт но чибориё. Лапландиысь сӥзьыл кадь. Нош со бере вуэ тол. Валтӥсь вакыт. Шунды уг пота. Инбаме йырдэ ӝутӥд ке, бездыт-ӵуж пиштэмез гинэ адӟод. Татысь калык дышиз ни уй 2-3 час котырын вуэ шуыса.

Бусытӥ хаски дӧдьыен ворттӥськом. Тём-тём пеймыт. Дышымтэ вылысь мыным йӧтэ уйшор вуэ ини шуыса, нош часэ 15.20 возьматэ. Кӧня ке час ортчыса выль 2015 ар вуоз. Мон Лапландиын? Зэм? Шумпотонме кутыны быгатытэк, маке Сайлентъёслэсь кырӟаны кутскисько. Тӧл котырам вузэ, соин ик эшъёсы уг кыло паймымон саам кыллы ӵыжы-выжы луись удмурт кылме. Эшъёс сяна, тонэ нокин уз кылы та лымы дуннеын. Ортчы иськем но, шудэд вань ке, оло, 1-2 муртэ пумиталод. Уйпал пиштэм (кыӵе ке шуш кылӥське, ӟуч кылын мыным кельшегес - Северное сияние) чебер ке но, со вӧзын улыны секыт но кезьыт. Юасько саам гидмылэсь пуныосты туристъёс понна гинэ-а вордо шуыса. Ум, пе, толалтэ вакытэ соосын зэм но ветлыны луэ. Но берло дыре snowmobile популярнойгес луэ. Эх, глобализация...

Ӝоген Йоулупукки (удм. Тол Бабай) но лимузинэн гинэ ветлоз ни ке шат. Нялтас вераса... Вань-а лыдӟисьёс пӧлын удмурт филологъёс? Быгатоды-а вераны Лапландиысь Тол Бабай выжыезъя кин луэ шуыса? А ми дышетӥмы вал. (Наталья Владимировна, салам!) Со - саам. Куное пыракумы, дырыз 50 "пиналъёсын" вераськыны ӧйгес вал, соин ик ӧй юа тодэ-а анай кылзэ шуыса.

Santa Claus village

Рованиеми - финн Лапландиысь тужгес но бадӟым кар. Ог 50 000 адями улэ татын. Паймымон, но быдӟалаезъя со Европаын нырысетӥ инты басьтэ, уго со пушкы матысь гуртъёс но пыро. Нош тужгес но тодмо луэ Рованиеми Санта Клауслэн гуртэныз. Выль ар но Ымусьтон вакытэ та пичи гинэ инты пуштэ туристъёслэсь. Аэропортэ куинь поллы тросгес адями вуэ, нош Финляндилэн бюджетэз узырме. Огназ Тол Бабай уг ни быгаты ужаны, соин ик котькытын Апполон тусъем гномъёс ветло. Эльфъёсты татчы топ-модельёс пӧлысь быръё, лэся. Выжыкыл дуннеын гномъёс но, эльфъёс но, ачиз но Санта Клаус пӧртэм кылъёсын верасько. Зато тросэз куноос ӟучен гинэ :) Нимаз почтазы вань. Нуналлы быдэ сюмильон гожтэт татчы вуэ но татысь кошке. Со сяна, гурт Полярной кругын интыяськемын. Та гожез потэмед сярысь тыныд быгато паспортад официальной печать но пуктыны... тон Россиысь ӧвӧл ке. Эскери...

Вырӟиськом пужей фермае.

Poro - пужей

Быдэс дуннеын саамъёслы гинэ пужейёсты вордыны яра, малы ке шуоно Йӧ вакытысен, дыр, ини соослэн улонзы ог-огенызы юн герӟаськемын. Пӧйшуръёс одӥг интыын улыны уг быгато бере, саамъёс но вашкала вакытэ ялан интыысь интые улыны выжо вал. Туннэ нуналлы Лапландиын котькуд пужейлэн ас кузёез вань. Сӥзьыл фермеръёс люкало пӧйшуръёссэс но али вордскем кунянъёслы, куспазы люкыса, аспӧртэм пус пукто. Пужей котырын саамлэн улонэз пӧзе: сиён, дӥсь, коньдон. Шуныт гон уг сёты адямилы толалтэ ӟонграса кулыны, нош кӧё сӥль тырмыт витамин сётэ. Асьсэлы тырмыт сӥль куасьтыса, сылалтыса но ӵынатыса, та уйпал калык бизнес но лэсьтыны выре: вуза кылем сӥлез, сюръёсты (кин соосты басьтэ?? ноку но дорам ӧй ошысал! ), куосты но киужен выре.

Адямиос люкисько кык типлы: кин ке яратэ коӵышъёсты, нош кин ке - пуныосты. Пужей фермае вуыса мон тодӥ кинэ яратӥсько мон! Кузь сюро, бӧксись, скал синмо мусо пӧйшуръёс, соос уг ни кышкало адями киысь ӝуй сиыны. Соосты сюдэммы бере, милемлы дэмлало чум пушкы пырыса сӥльзэс но веръяны. Тылскем вӧзы пуксиськом. Котыр шыд но сӥль лэзё - саам чум пушкын ветлыны уг яра, озьыен, киысь кие гинэ сётыны луэ. Веръясько. Мдаа... Талы дышыны кулэ. Мырдэм ньылӥсько.

Йойк

Ялан пеймыт но кезьыт куазен улыса, калыклы пуш мылкыдзэ кызьы ке но шараяно. Соос кырӟало. Инкуазь, адями, пӧйшуръёс но улонысь учыръёс сярысь. Зэмзэ ке, кырӟанъёсазы кыл трос ик ӧвӧл, ӵемысь соос аспӧртэмлыко гуръёсын но ритмен висъясько. Сыӵе кырӟан амалзэс саамъёс "йойк" нимало.

Ма шуод, конечно, мыным кельшиз Лапландиын, куазь укыр шуныт ке но вал, ог -3 -10 градус. Озьы ке но, йылын ялан бергаз "winter paradise" (google в помощь!). Быгатысал-а мон татын улыны? Ӧй! Арня куспын но шундылэсь мӧзми. Эшшо ке магистерской уже саамъесын герӟаськемын бере, дисер сярысь малпаськытэк ӧз лу. Али но малпаськыса кӧт кизерме! Кыл сётӥ татчы выльысь куке но гужем вакытэ вуыны, евро 100 манет нош ик уз луы ке!

#NordicTrip азьланьтӥське но мон вырӟисько Стокгольме, нош отысен Ослое.

Фотоос луозы на :)

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер