Микки Маус но Frozen angels

«Вождэс эн вае, мон туннэ Микки Маус кадь» - таӵе кылъёсын ас концертсэ кутскиз паймымон Лара Фабиан. Калык азе кырӟась потӥз шуныт сьӧд курткаен, изьыен но пӧзьыосын. Залын кезьыт, концертэз радъясьёс кутсконаз ик кышкатӥзы, оло, пе, вакчиятыны кулэ луоз – Ларалэн куараез пуксиз ке, номыр уд кары ни, сое утьыны кулэ. Озьы ик пӧрмиз, час но ӝыны гинэ шуд кыстӥськиз.

Нырысьсэ Ижкаре сокем тодмо кырӟась лыктэ шуыса, мон адӟи тошоре, дыр. Азьланяз сессия, нош 9-тӥ южтолэзь сузёнтэм дунне кадь йӧтӥз. Отчыозь улыны кулэ ай, малпай. Кык толэзь тӧл кадь шуласа лобӟизы, сессия но тыбыр сьӧрын ини, билетэ но ӧвӧл. Кӧня ке нунал талэcь азьло эше гожтӥз, оло, пе, тодмоед вань, кинлэн Лара Фабианлэн концертаз мынэмез потэ. «Ачим уг быгатӥськы, со нуналэ Казане кошкисько». Бен, мон соку ик тодӥ, кинлэн ӟырдыт мынэмез потэ! Чик малпаськытэк соглаш кариськи – оскисько, сыӵе учыръёс юнме шорысь уг луо!

«Кылдысин» куараё - шуо со сярысь крезьгурчиос. Кырӟа англи, француз, испан, итальян но, табере, ӟуч кылын. Ачиз ик текстъёссэ гожъя. Талантсэ яратӥсь фанатъёсыз карысь каре дась сьӧраз ветлыны, юри бускель элькунэ лыктыны. Ижкарысь калык но шуныт пумитаз Франциысь дано куноез. Эсьмаса Элькунмылэн азьмуртэз но вуиз. Концертэ мыныкум, малы ке дасяськи кыӵе ке опералы укшась концертлы, нош нырысетӥ минутаз ик Фабиан сӧрӥз та малпанме. Шуныт курткаен сцена вылэ потыса учкиз шорамы но сцена сьӧрын сылӥсь радъясьлы вазиз, ноку но уг кырӟа ни татын, пе, озьы ик кылзӥсьёсме азьланяз но кынтоды ке, нош калыклы («my sweet frozen angels») тау кариз чиданмылы но йӧ вылын кынмыса пукеммылы.

IMG_0400javascript:void(0)

Сцена вылын сылӥсь нылкышно соку ик быдэс залэз быгатӥз бордаз кыскыны.  Котькуд кырӟанэзлы ачиз ик валэктон но сётъяз, валаса-а валатэк-а люкаськем калык шумпотыса чабиз но кытын кулэ серекъяз. «Нош али тӥ мыным юрттоды» - англи сямен вазиз Лара но быдэс зал тыршыса кырӟаз «Solei solei» («Шунды шунды») кырӟанзэ. «Кӧня ке ар талэсь азьло мон вуи чебер шаере но пумитай принцез. Солэн нимыз – Игорь Крутой. Соин ӵош ми крезьгуро альбом дасямы, кудӥз нимаське «Доктор Живаго» но али одӥг кырӟанзэ тӥ понна быдэсто». Кулэ-а вераны, кыӵе калык куанӥз та иворлы? Нялтас вераса, «Доктор Живаго» альбомзэ луэ вал фойеысь басьтыны, учки-учки но, лулӟыса кошки. :) Выль кырӟанъёс сяна, Игорь Крутой кузьмаз Фабианлы одӥг вужзэ но кырӟанзэ, кудзэ азьло Алла Пугачёва быдэстэ вал – «Любовь похожая на сон». Ӟуч кылэз дышетытэк ӧз луы. Таин концерт йылпумъяськыны кулэ вал. Нош калык нокызьы уг лэзьы муспотон пальпотӥсь кырӟасез. «Ну ярам, берпуметӥ-берпуметӥ кырӟанме тӥ понна быдэсто, кезьытын пукыса чидамды понна». Озьыен концерт быриз «Адажио» кырӟанэн. Мон англи текстсэ уг тодӥськы бере, ныр улам удмуртэн сое нургетыса пуки.

Lara Fabian - Adagio (english version)

Лади Светӥ - Адажио (удмурт версия)

d639997

IMG_0394

ЗЫ: Видеосты Владислава Володиналэсь кыски, бадӟым тау солы со понна!

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер