Кӧснунал Пуклёын

Бертӥсько гуртэ. Кык берпуметӥ арня укыр секыт йӧтӥзы, йырлы кулэ шутэтскыны. Анаен-атае ӵош пумитало бускель гуртын, кыкназы но мыняло. Гуньдӥсько, синвуосы потыны дась. Соос монэ возьмало, соос монэ ярато. Корка доры вуыкумы маке синме вандэ. Анае капкамес ӵуж буям (кӧня асме тодӥсько со котьку вал «фисташковый»). Ог дышем нырысь ик лэсьтӥсько эскерон обход но бакчае потӥсько. Четкерысен тылобурдо куараос кылӥсько, тӧл кален гинэ пелля, шунды ненег гинэ бамме веша. Бускель кышно бакчаяз потэ, кенер сьӧрады йӧл пуктӥ, пе, анаедлы сёт (ас поннам пусйисько: со "ӟечбур" но, "ӟеч лу" но ӧз шуы, мон "тау" шуыса но ӧй вутты, нош диалог быриз, собере малпасько - гуртын со нормально, удмурт гуртын). Йӧл пыртэм бере дуринчи карез эскерисько. Мон соосты таяз гужеме шедьтӥ трубаысь.. соос али отын, но, шӧдске, толлэсь шокамзэ валало ни.

nqEE8oHeDf4

Пыри теплицае, ышкалтӥ куяр, сое йырйыса азьланьтӥсько обходме. Унябей.. Тон кытысь на? Али но сяськаяськиськод? Грушапу емышъёсыз йырин улӥе лэзькемын ни, бичано ке шат.

IMG_0015

Анае потэ, кытын ке но куаръёс пӧлын сое но адӟоды.

IMG_0014

IPear

IMG_0021

Мятае.. Школаын берпуметӥ аръёсме дышетскыкум мон тае ву дурысь копаса ваи, мерттӥ, табере анае сое интыысь интые выжтылэ, котькытчы мерттэм ни.

IMG_0022

Мур лулӟылӥсько. Кылем уе дадаелэн Гракын выль пуктӥськиськись автосервисаз кин ке тыл понэм. Адямиос, малы тӥ сыӵеесь..малы? Кинлы-мар семьяе урод лэсьтӥз? Ма понна? Тодӥсько, анаелэн но, атаелэн но али йыразы таӵе ик малпанъёс бергало. Син азям пуксе, кызьы 4 часын ӵукна дадаелы Гракысь жингырто но со, рос-прос дӥсяськытэк, лобӟыса машинаен Граке мынэ, вань сюлэмшугъяськонзэ шӧдӥсько кадь. Кӧня со кужым понӥз та ужезлы, выль здание пуктон понна кӧня тыршиз!.. Ярам хоть зол арам луымтэ. Вӧлдэтэз уродмиз. Ӟеч но адямиос вань на.

Анае усьтэм укнотӥ миськон понна дӥсьме люканы косэ. Дыртытэк корка пырисько. Каллен, пичиен вамышъясько, висись, курадӟись мугорме зуркатыны кышкасько, кадь. Турымен чай дасям, нош ик лулӟисько сикылиме кутон вылысь.

P.S. Гуртын гань-гань, анае каллен сандык дася, бакча емышъёсты октон вакыт вуэмын ни, луло-сюлмо сюй бордын вырисько, кужым люкасько. Вордӥськонэ (*понедельник) нылпиос доры мыноно, соослы уг яра возьматыны сюлэмшугдэ - лябдэ шӧдозы, уз кылзэ, уз гажалэ.

P.P.S. Анаелэн ӵуказе - 17тӥ куарусёнэ - вордскем нуналэз. Солы 60 арес тырме!!:)

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер