Гужем тылсиос

Кыӵе ке секыт гужем кутскиз мон понна. Мылкыд воксё куашказ... Улон - со зебра. Сьӧд гожлы черод вуиз, малпай. Бен, со вуиз.. Но кызьы учкод ук югдур шоры. Сьӧд ке но, со буёл ук, чебер луыны быгатэ! Туннэ тани улон пӧзе! Быректыса ик пӧзе! Мон сӥльтӧллэн шорсюлмаз сылӥсько кадь. Эмъяськонниысь потыса гинэ вуи, витьымтэ шорысь сюри удмурт кылъя курсъёсы ужаны. Тодматсконъёс, выль эшъёс, элькунмылэн пӧртэм тунсыко интыосаз ветлон. Со бере сьӧд чур..... арня пала буш нуналъёс! ЧИДАНТЭМ!

Инмарлы (но Петруш Палганлы) тау - Ижкарын али "Пузкар" нимо выль удмурт фильм пуктӥське. Уж трос. Но кыӵе луоз емышез?!.... ческыт! Тросэз малпало, киноез лэсьтыны туууж капчи: кутоно 2 полякъёсты, камераез, гожтоно верос но вазь ӵукна султыса нуналскын кино пӧрмытоно.

Ӧвӧл! :) Матын но ӧвӧл! Шудэд вань ке, одӥг нунал куспын 3 сценаез гинэ рос-прос лэсьтыны луэ. Ог час пала дасяськыны кулэ: калыкез радъяно, валтӥсь геройёсты дӥсяно-буяно, эскероно, кызьы соос кылъёссэс, диалогъёссэс дышетӥллям. 2-4 час кошке сценаез лэсьтыны, котькуд кадрлы олокӧня дубль лэсьтоно. Актёръёс сурало кылъёсты, витьымтэ шорысь кинлэн ке телефонэз жингыртэ... да мар гинэ уг луы? Съёмка мыныку, кадр сьӧрын шокчыны но мултэссэ уг яра - оло укыр шара луоз, кылӥськоз микрофонэ? Соку Петыр шорад лек учкоз! Кышшшкыт! А эшшо куазь "яратэ" кино лэсьтонлы юрттыны! Куке кезьытлэсь пинь пине уг сюры кулэ дӥсяны вакчи дэрем но возьматыны, кыӵе тыныд "гужем пӧсь". Нош дӥсязы ке актёр вылэ шуныт дӥсь, тод но ул шунды Африкаын кадь пиштоз! Кык час ӵоже чай юыса, со чаед ымтӥ потэ ни, нош тыныд возьматоно, кыӵе тон яратӥськод ӝок сьӧрын кунояськыны, вӧзаз варення сиыны на. Куинь часын уин нормальной адями изе ни, нош тон 50-тӥ табаньдэ гур азьын пыжиськод. Эшшо ке вадьсалод куазьлэсь юрттэмзэ (нуназе 30-35 градус пӧсь! кыӵе гур гужем?!)... али ваньзэ серекъяса тодам вайисько.

Учкисько али съемкаосыз но адӟисько - ваньмыз иняз мынэ: кин ке ялан кадр сьӧрын кӧс вайёс вылтӥ люкетыса ветлэ; текстэз 10-20-тӥ пол вераку, кыӵе ке кулэ луись фраза одно ик вунэ; нуназе сиён чырсам луэ; шунды интые зор кисьтэ, кезьыт интые пӧсь куазь музъем борды зӥбе; валтӥсь геройлы уг кельшы чыртые дӥсян бабочкаез; Петырлы уг кельшы валтӥсь героинялэн дэремез!.. Ваньмыз мынэ озьы, кызьы кулэ. Кыӵе со ваньмыз мусоооо… :)

Эшшо огзэ вунэтӥ. Палэнысен учкыса, ми ваньмы туууж визьмоесь луиськомы! Учкыны дотово капчи вылэм, нош лэсьтыны... лэсьтонъя тыбыр чигиськоз!

IMG_0038

IMG_2593

IMG_2593

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер