Анай

Шуркынмонлэн берпуметӥ арнянуналаз ми пусйиськомы анайёсмылэсь нуналзэс. Уйшорысен ик кутскыса яратӥсь нылпиос анайёссылэсь туспуктэмъёссэс контактэ пуктылыны кутско, вӧзаз ӟечкыланъёс. Кин ке но анаеныз ӵош синмальдымон мыня, кинлэн ке но анаезлэн студент вакыт туспуктэмез сюрем, тросэзлэн сьӧдо-тӧдьыё партертъёссы.

Пукисько, зар-зар бӧрдыса, дуно адямиелы ӟечкыланэн SMS гожтӥсько – «Анайлы» кылбур. Бӧрдӥсько, м.к.ш. таяз шутэтскон нуналъёсы туж потэ вал гуртам бертэме, но ӧз пӧрмы; м.к.ш. туннэ мунчо бере мон со вӧзы выдыса кылльысал, нош со интые огъяулонниысь висъетын огнам пукисько; м.к.ш. ӵуказе ӵукна мон солы сяськаосын букет кузьмасал, но табере уг кузьма; м.к.ш. арня пумын со мыным салам келяз – юри пыжиськем мон понна; м.к.ш. мон солэсь мӧзми; м.к.ш. огшоры кылъёсын уг луы вераны, макем мон сое яратӥсько, гажасько, ваньмыз понна тау карисько! Та кышномурт 37 аресын ӧз кышка нош ик пинал вайыны.. Туэ мон 5 курсме йылпумъясько ни!

Али татын анаелэн туспуктэмез луыны кулэ. Жаляса верано, мамаелэн институт вакыт фотоез ки улам ӧвӧл. Ато возьматысал, ӵошен пуктыса, кыӵеесь ми! Атае шуэ, туж, пе, кельшиськом ог-огмылы. Со тодэ, дыр, угось таӵе вакытаз синмаськиз солы. Туэ тусбуйзэ пуктыны ке, тодӥсько, макем со уг яраты аслэсьтыз фотооссэ. Сыӵе со мынам. Огпол Иже ветлыкуз, йӧкана вылэ лякем папаен фотозэс басьтыса ик нуиз!

Нош зэмзэ ке, шуныт, сюлэмез либатӥсь, шумпоттӥсь кылъёс яратоно адямиосмылы араз 2-3 пол гинэ верано ӧвӧл, соосты кулэ вераны котькуд нунал. Кыӵе дуно ведь телефон трубка пыр пальпотӥсь куараез кылыны!

Мама, яратӥсько!

"Выль" праздник дыръя лэсьтэм фото.

ТОП-10 юанъёс Эстониын улон-вылон сярысь ТОП-10 юанъёс Эстониын улон-вылон сярысь Nordic Trip. Part I. Lapland. Nordic Trip. Part I. Lapland. Rīga Rīga Зангари шаер Зангари шаер